அதிசய பாலமுருகன்
எனக்கு பாலமுருகன் போல
வேறு ஊர்களில் வேறு ஒருவருக்கு வேறு ஒருவர்
எல்லாரும் இன்றைக்கு என்னுடைய நினைவிற்கு வந்தனர்
அவர்கள் என்னுடைய பக்கத்திலில்லை
அவர்கள் யாரும் எனக்கு பழக்கமுமில்லை
அவர்களை நான் பார்த்ததுமே இல்லை
பாலமுருகன் என்னுடைய பால்ய நண்பன்
கையால் தொடமுடியாமல்
வானத்தில் ஒரு நட்சத்திரத்தைப் போல
ஏற்கனவே மினுமினுங்குவான்
இப்பொழுது
வானத்திற்குப் பின்னால் வானங்களென
ஒன்றையே ஊதி ஊதிப் பெரிதாக்கிக் கொண்டிருக்கின்றான்
துயரக் கத்தி
என் துயரம் எடுத்துச் சொருகப்படாத ஒரு கத்தி
அதனால் சாக ஆயிரம் முறை காத்துக் கொண்டிருக்கிறேன்
எல்லா முறைகளும் வேறு வேறு ஊரில் வசிக்கிறன
தனித்தனியாக எல்லாம் வேறு வேறு வேலையைப் பார்க்கிறன
ஒன்றுக்குத் தெரியாமல் ஒன்றை வளர்த்து வருகிறேன்
ஒன்று மாதிரி இல்லாத இன்னொன்று
இப்பொழுது ஆயிரம் முறைகளையும் எடுத்து கொத்தாக
என் மீது மேயவிட்டிருக்கிறேன்
எடுத்துச் சொருகப்படாத கத்தியை
மிகவும் பெருமையாக பார்த்துக் கொண்ட தருணம் அது
மூன்று கோபங்கள்
அப்பா என்னை விரோதியென்று சொல்லி நாட்களாயிற்று
எனது இரண்டு சகோதரர்களும் சமீபத்தில்
இதே இந்தச் சொல்லை
பிறந்த ஒரு சிசுவைக் கையிலிருந்து நழுவவிடுவது போலக் கண்டனர்
அண்ணனை விட இரண்டு மாதம் மூப்பு என
அம்மா கைக்கும் வாய்க்குமாக சொல்லிக் கொண்டிருக்கின்ற ஈசிச்சேரில்
தன் மொத்தக் கோபங்களையும் வைத்து ஒருநாள் அப்பா
சரிபார்த்துக் கொண்டிருந்தார்
எல்லா கோபங்களிலும் அவருடைய சிறந்த கோபம் எது
எங்கள் மூவருடைய முகங்கள் அவருக்கு ஞாபகத்திற்கு வந்திருக்க வேண்டும்
இதனை எதிர்பார்த்திருக்கமாட்டார் அவர்
கோபத்தை எதிர்பார்த்திராத வழக்கமான ஒரு நாளில்
வழக்கம் போல ஒரு கோபத்தை நேருக்கு நேராக சந்தித்தார்
எண்ணற்றவை
திருமணத்திற்கு அழைத்து வராததால் நண்பன்
அலைபேசியில் உரிமையாக கோபித்துக் கொண்டான்
கோபத்தையே ஒரு படகாக்கி
அவன் கூட்டிப்போன தூரம் வரை சென்றேன்
கல்யாண வேலை இன்னுமும் முடியவில்லையென
ஒரு இடத்தில் இறக்கிவிட்டு அங்கிருந்து கிளம்பிவிட்டான்
என்னுடைய பழைய இடத்திற்கும் இந்தப் புதிய இடத்திற்கும் இடையில்
எண்ணற்ற மலைகள் எண்ணற்ற புதர்கள்
தன்னுடைய வாழ்நாளில் மனிதர்களையே பார்த்தறியாத
அந்த மலைகள் புதர்களுக்கு இருக்கும் ஒரே பொழுது போக்கு
அதன் எண்ணற்ற தன்மையே
அவைகளும் ஒரு பலூனைப் பார்த்துவிட்டால்
அதன் பின்னால் பறந்து செல்லும் விசித்திரம் கொண்டவை
ஆச்சர்ய மீன்
ஆச்சர்யங்கள் நீருக்கடியில் நீந்துபவை
கை விரல்களின் மென்மை
கண நேரத்தில் பதவிசான ஒரு முகமாகி தெரிகின்றதைப் போல
எப்பொழுது எங்கிருக்கிறதென்று தெரியாது
வீட்டிற்கு வந்த விருந்தாளிகளை நாய் குரைத்தது
அதனை அதற்றி அவர்களை உள்ளே வரவேற்று
குடிக்க காபி பலகாரம் கொடுத்து வழியனுப்பினார்கள்
எஜமான மிடுக்கில் நாயின் உஷார் தன்மைக்கு
இரண்டு பிஸ்கட்டுகளை வழங்கி
க்ரில் கேட்டை சாத்தி அவர்கள் அன்றாடங்களோடு கலக்க
நீருக்குள்ளிருந்து மேலெழும்பியதை யாருமே பார்க்கவில்லை
அந்த நாய் மட்டும் ஒன்றையே பார்த்து ரொம்ப நேரத்திற்கு
கண்களை உருட்டி உருட்டிக் கொண்டிருந்தது
