இரண்டு நாளாய் இடறிச் சென்ற
வானம் பார்த்து ஏமாந்த
கடவுளெனும் முதலாளி
ஆழக்குழி வெட்டி பெரு விதையாய்
அதில் தன்னை
நட்டுவித்துக் கொண்டான்
ஈரோட்டிலிருந்து கோவை செல்லும்
பாசஞ்சர் ட்ரெயினிலிருந்து கட்டம் போட்ட
லுங்கியணிந்தவனொருவன் இறங்கி
ஊருக்குள் வந்து தன்னை ஊருக்குப் புதியவன்
என்று அறிமுகப்படுத்திக் கொண்டான்
பின்னாளில் அவன் ஊருக்குப் பழையவன்
ஆகியும் போனான்
ஆள் நடமாட்டமுள்ள சாலையில்
கற்பக விநாயகர் ஓவியத்தை
வார்ணச்சாக்கட்டிகளால் வரைந்து
முடித்தவன் சோர்ந்து போய்
தலைகவிழ்ந்து அமர்ந்திருந்தான்.
வழியாகச் சென்ற கடவுளின் கால்சட்டைப்
பையில் பைசாக்கள் எதுவுமில்லாததால்
பாவம் என்ற சொல்லை உதிர்த்துச் சென்றார்
கடவுளின் கைப்பேசி எண்ணை எனக்கு
கொடுத்துப் போன கனகவள்ளி சொல்கையில்,
இவர் எப்போதும் எல்லைக்கு வெளியேயே
நடமாடிக் கொண்டிருப்பதாக ஒரு பெண்
சொல்லிக் கொண்டேயிருக்கிறாள் என்றாள்.
விதைப்பதற்காக கண்டங்கத்திரி விதைகள்
சிலவற்றை வைத்திருந்தான் அவன்
இதோ வருகிறேன் என்று இடித்துத் சொல்லியபடி
இருந்த வானம் இறுதியாய்
நாளை வாறேன் என்றோடிப் போனதுவே
விதைகள் அடங்கிய பையை மீண்டும்
பத்திரப்படுத்திவிட்டு டாஸ்மாக் நோக்கி
நடையிட்டான் விதைப்பாளன்.
