மற்றது தின்றது போக
ஆமைக் குஞ்சில்
ஆயிரத்தில்
ஒன்று தேறும்
மற்றது தின்றது போக
பறவைக் குஞ்சில்
நூற்றில் பத்து தேறும்
விலங்கில் பத்தில் ஒன்று
வாழ்வது வீடெனில் விதிவசம்
தானே தின்றது போக
மனிதனுக்கு
லட்சத்தில்
ஒன்று
தேறும்
மீதம் நீறும்
•
ஆடுகடித்து காயம் பட்ட
சரக்கொன்றையை
மிசுறு எறும்புகள் கூடி
காப்பாற்றுகின்றன
ஒரு காரணத்திற்குள் ஒன்று
ஒன்று மற்றொன்று என
நீள்கிறது யாத்திரை
யாருடைய காரணத்திற்காகவோ
நீங்கள்
என்னுடைய காரணத்திற்காக அவர்
அவருடைய காரணத்திற்காக
மற்றொருவர் என
ஒரே பொதிதான்
பிரிக்க பிரிக்க
பொதி பொதியாக வருவது
•
உடல் விடர்த்து
தளிர்க்கும் அரசமரம்
மரத்தின் எலும்புக்கூடென
நிற்கிறது
அதன் மேல் அமர்ந்திருக்கும்
காகங்கள்
கிளிகள்
கொக்குகள் அரசின் கனிகள் போல
தொங்குகின்றன
அடுத்த பருவம் இவை உதிர்த்து
பச்சயம் பூக்கும்
எல்லாமே வெட்ட வெளியில்
நடக்கின்றன
ஒளிவு மறைவு என்று
ஒன்றுகூட இல்லை
பிரதான சாலையோரம்
இது
•
நெடுநேரம்
காம்பௌண்ட் சுவருக்கு அந்தப்பக்கமாக
குழந்தைகளோடு விளையாடிக் கொண்டிருக்கிறது
ஒரு இளைய மாமரம்
ஒரு கிளையில்
முதலில் சிரிப்பது தெரிகிறது
பின்பு குதிக்கிறது
குழந்தைச் சேட்டை
அத்தனையும் செய்து முடிவில்
கிளையைத் தாழ்த்தி
எல்லோருக்கும் முத்தமிட்ட பிறகு
கையை மெதுவாக விலக்கி
கிளையை உதறி
தன் இயல்பு நிலைக்குத்
திரும்புகிறது
இயல்பில் காற்றசைந்து
தன்னிருப்பை
நடனத்தில் மீட்கிறது
குழந்தைகளிடம்
இளைய
மாமரம்
சிறையிலிருந்து வெளிப்படுபவனின்
ஆசை முகத்தோடு
எல்லாமே நிபந்தனைகளுக்கு உட்பட்டவைதான்
1
கர்மா
தனக்கு
தாமதமுண்டாக்குகிறது
தனக்கு நடக்கவேண்டியவை
பிள்ளைகளுக்கு நடக்கின்றன
அதற்கும்
தடுமாறாதிருக்கவேண்டும்
2
கலை
பேரர்களுக்கு நடக்கவிருப்பதை
காலம் தாண்டி
தனக்கு
கொண்டுவருகிறது
ஆனால்
களிம்பு ஏறக்கூடாது
எல்லாமே
நிபந்தனைகளுக்கு உட்பட்டவைதான்
3
பாரதி கேட்டான்
எல்லாம் எனக்கு
வந்து சேர்ந்திருக்கின்றன
4
அகந்தை உடைந்து பின்
மீண்டெழல் வேண்டும்
எப்போது உடைந்தது
எப்படி மீண்டது எனும் சிறுமணிச்சப்தம்
இடுப்புக்குக்கீழே
ஓயாது
ஒலிக்கவேண்டும்
5
நான் நானாக இருப்பதும் ஆச்சரியம்தான்
நீ நீயாக இருப்பதும்
ஆச்சரியம்தான்
6
கடும் இருளுக்குள் உள்ள
ஒளிக்கு
ஒளி
அதிகம்
7
முப்பத்து முக்கோடி தேவர்களில்
நீயும்
உண்டுதானே?
8
ஊழை உடைக்க விரும்பினால்
கூட்டு சேராமல்
ஒன்றுபடு
9
அடுத்தவனைக் காயப்படுத்தினால்
தன் மேல்
வடுப்படும்
10
வடுவுண்டாக்கவேண்டும்
அது பேற்றுக்காய் இருப்பின்
பரவாயில்லை
11
உடைந்தவுடன் கூட்டி எடுத்தால்
உடைந்த பொருள் திரும்பிவிடும்
உடைந்த பொருள் திரும்பிவந்தால்
மீண்டுமது
உடையும்
12
தன்னைத்தானே உடைக்கும்போது
தரணியெல்லாம்
தெரிகிறது
13
அனைத்தும் அறிந்தவன்
மீண்டும்
முதலில் இருந்தே
வரவேண்டியவன்
