சாக மனதில்லாதவர்
விளையாட்டுத் துப்பாக்கி எடுத்து
எல்லாரையும் சகட்டுமேனிக்குச் சுட்டான் பொடிப்பயல்
சாக உடன்பட்டவர்கள் நெஞ்சைப் பிடித்துக் கொண்டு கீழே சாய்ந்தனர்
சாக மனதில்லாதவர்கள் நெஞ்சைக் கல்லாக்கிக் கொண்டு
போங்கடா நீங்களும் உங்க சின்னப்புள்ளத்தனமும் என
போர்க்களத்திலிருந்து ஆயுதங்களைத் தூக்கியெறிந்துவிட்டு
வெளியேறுவது போல வெளியேறினர்
செத்து விழுந்த ஒருவர் எழுந்து வேகவேகமாக ஓடிவந்து
நிராயுதபாணியாகச் சென்ற சாக மனதில்லாத ஒருவரை இடைமறித்து
எங்கே போகப் பார்க்கின்றீர்
இந்தாருங்கள் உங்கள் ஆயுதங்கள் என்றிருக்கிறார்
ஏற்கனவே வீசியெறிந்துவிட்டேனே இல்லாத ஆயுதத்தை
எத்தனைமுறைதான் வீசுவது என்று சலித்துக்கொண்ட அவரை
போர்க்களத்தில் இந்த தடவை நெற்றிப்பொட்டில் சுட்டான் பொடிப்பயல்
அவர்தான் சாகவில்லை
யூகங்கள் பற்றிய சில யூகங்கள்
வரவா வேண்டாமா என எண்ணிக்கொண்டேயிருக்கும் தயக்கம்
ஒரு தண்ணீர்த் தவளை
தலையை வெளியே காட்டாமல் தண்ணீருக்குள்ளே கிடக்கும்
வெளியில் நின்று கொண்டு தண்ணீர்த் தவளை என்பவர்களை
வெளியிலிருந்து பார்க்க நாங்களென்ன தெரியவா செய்கிறோம்
தண்ணீர்த் தவளை என்கிறீர்கள்
உங்கள் வேலையைப் பார்த்துக் கொண்டு போங்களென
தண்ணீருக்குள்ளேயே இருந்து கத்தும்
பொதுவாக தயக்கம் சொல்வது எதுவும் கேட்காதென்பதால்
இதுவுமே கேட்காது
ஆனால் அதற்கு காதுகள் உண்டு வெளியில் தெரியாது
வாயுமே உண்டு பேசுவது கேட்காது
அதனால்தான் தயக்க உலகத்தில் எந்நேரமும் ஒரே ஜாலி
என மார்தட்டுகிறது
காலம் காலமாகவே அதை யாராலும் பார்க்க முடியாது
அதைப் பற்றிச் சொல்வதெல்லாமே ஒரு யூகம் தான்
ஆனால் யூகங்களை அது அறவே வெறுக்கின்றது
அதனைச் சந்திக்கப் போனவர்களெல்லாம் ஏமாற்றத்துடன் தான்
திரும்புகிறார்கள்
ஒரு மாவீரன் மாற்றுரு கொண்டு உண்ணாமல் உறங்காமல்
வெகுகாலம் பயணித்து தயக்க லோகத்தை நெருங்கிவிட்ட சமயத்தில்
எப்படியோ தெரிந்து கொண்ட அதன் பிரஜைகள் தங்கள் உலகத்தை
வெடிவைத்து தகர்த்துக் கொண்டார்கள்
உயிருடன் தப்பியவர்கள் புதிய உலகத்தை நிர்மானித்துவிட்டதாகச்
சொல்கிறார்கள்
காலத்திற்கும் தயக்கம் கேட்கும் கேள்வி ஒன்றே ஒன்று தான்
அதெப்படி இவர்கள் சொல்கிறார்கள்
திலோன் பென்ஹரை அந்தக் கழுதை கன்னத்தில் கடித்தது
பாதியில் கைவிடப்பட்ட கவிதை அதிகம் வருத்துகிறதா
அதற்குத் துரோகம் இழைத்துவிட்டதாக குமைகிறீர்களா
இயலாமைத்தனம் வந்து கழுத்தை நெரிக்கிறதா
தங்கமாரியப்பனைப் போய்ப் பார்க்கலாம்
மனைவி மக்களை கூட்டிவரவில்லையா என அவன் கடுப்படிப்பான்
வைகுண்ட ஏதாதசியன்று விடியற்காலையில் நடந்தே வந்து
அவர்களா மலையேறினார்கள்
சொடக்குத் தக்காளி பறிக்க அவர்களா கூட்டிப் போனார்கள்
சிங்கார வேலன் படத்தைச் சிரிக்கச் சிரிக்க அவர்களா சொன்னார்கள்
சிறிய வயதில் அவர்களா நம்மோடு சிறியவர்களாக வாழ்ந்தார்கள்
பொய்க் கோபம் காட்டினால் சிரித்துக் கொள்வான்
பஸ் ஸ்டாப் அருகே சேகர் டீ கடை இருக்கும்
அங்கு திலோன் பென்ஹரை அப்பொழுது கடித்த கழுதையை
இப்பொழுது விரட்டிவிடலாம்
அசுரன் பட போஸ்டருக்குப் பின்னால் வானமே எல்லை போஸ்டர்
நிச்சயம் இருக்காது
கிழித்துப் பார்க்கலாம் கொலைப் பாதகச் செயல் ஒன்றுமில்லை
5.30 க்கு ஆர் எஸ் ஆர் வரும் அதில் ஏற வேண்டாம்
ஸ்ரீநிவாசா செந்தில் ஆண்டவர் எல்லாம் போகட்டும்
ரெண்டு பேர் பஸ் ஏறுவார்கள் புதிய ரெண்டு பேர் வந்து காத்திருப்பார்கள்
பார்க்க அது தானே மகிழ்ச்சி
செந்தில் ஆண்டவர் இன்னுமும் அதே ஸ்டைலில்
ட்ரைவர் கூட அதே முகச் சாடையில் தான் இருக்கிறார்
சேகர் டீ கடையிலிருந்து அவனோடு கிளம்பி
வேலாயுத ரஸ்தாவில் அப்படியே ஒன்பது வரைக்கும் நடந்தால்
பாதியில் கைவிடப்பட்ட கவிதையே மீதியை முடித்துக் கொள்ளும்
உங்களுக்கு என்னமோ அதை நீங்கள் பார்த்துக் கொள்ளுங்கள்
