வீடு திரும்புதல்
அன்றெனப் பார்த்து சீற்றம் கொண்டது
கடல்
மரணித்த ஆமை ஒன்று கரையொதுங்க
அலைகளில்
புரண்டு படுக்கின்றன மலைப்பாம்புகள்
சேமித்த சிப்பிகள் சிதறும்படி
கைகளை உதறி சிறுமியை இழுத்துச் செல்கிறார்
தந்தை
பாதம் தொட விழையும் அலைகளில்
ஆளை விழுங்கும் ஆவேசம்
சிறுமி வெறுங்கையுடன்
திரும்ப நேர்ந்தது
கடலலை சிறுமி தொட்ட சிப்பிகளுடன்
அந்த நாளின் குலோப் ஜாமூன்
அன்று
அந்த சினிமாவிற்கு சென்றிருக்கக்கூடாது
அன்று
அந்த நண்பனை சந்தித்திருக்கக்கூடாது
அன்று
அந்த நள்ளிரவில்
யானை போல் மிமிக்ரி செய்திருக்கக்கூடாது
அன்று
அந்த மர்ம நாவலின்
கடைசி அத்தியாயத்தை படித்திருக்கக்கூடாது
அன்று
அந்த மெழுகுவர்த்தியை
மின்சாரம் வந்த மறுநொடியே
ஊதி அணைத்திருக்கக்கூடாது
அன்று
அந்த அதுவை
அன்று
இந்த இதுவை செய்திருக்கக்கூடாது
நிகழ்வுகள்
கசந்துபோய் நமக்கு உண்டாக்கியுள்ளது
இது போன்ற நீண்ட பட்டியல்
அன்று
அந்த குலோப் ஜாமூனை நான் ருசித்திருக்கக்கூடாது
மேஜிக்மேன்
இடது உள்ளங்கையில் ஆணியடித்துக் கொள்கிறார்
ரத்தம் வடிகிறது
அழகாய்ச் சிரிக்கிறார்
மேஜிக் மீது ஆசை வந்து
அதைச் செய்ய பழகினால் வலியில் உயிர்போகிறது
வெளிப்படும் ரத்தத்திற்கு சிரிக்க முடியவில்லை
முதலில் சிரித்துப் பழக வேண்டியிருக்கிறது
தன் கையை பொத்தலாக்கி
தன் ரத்தத்திற்கு தானே சிரிக்கும் காட்சி
சீக்கிரம் பழமையாகிவிடும் எனத்தோன்றியது
சிரிப்பதோடு நிறுத்திக் கொள்கிறேன்
அக்காட்சியின் மீது தூசிபடியாமல்
நீங்கள்தான் ரத்தம் சிந்துகிறீர்
